Kryetari i Gjykatës Supreme, Enver Peci, ka reaguar pas skandalit në Gjykatën Themelore në Pejë, ku një person i akuzuar për dhunimin e një të miture është dënuar me tetë muaj burgim.

Sipas njoftimit të Gjykatës Supreme, Peci ka kërkuar nga kreu i Gjykatës Themelore në Pejë, Armend Berisha të ndërmerr të gjitha veprimet ligjore si kryetar për të adresuar përgjegjësinë disiplinore lidhur me këtë rast, shkruan arbresh.info.

“Kryetari i Gjykatës Supreme kërkon nga kryetari i Gjykatës Themelore të Pejës të adresojë përgjegjësinë disiplinore lidhur me aktgjykimin PKR.nr.141/15. Lidhur me rastin e publikuar nëpër portalet e ndryshme të lajmeve për dënimin e të akuzuarit për veprën penale Dhunimi, e që pretendohet se ka pas shkelje ligjore, Kryetari i Gjykatës Supreme të Republikës së Kosovës, Enver Peci, bazuar në kompetencat që ia jep Ligji Nr. 06/L-057 Për Përgjegjësinë Disiplinore të Gjyqtarëve dhe Prokurorëve, ka kërkuar nga kryetari i Gjykatës Themelore të Pejës, Armend Berisha që të ndërmerr të gjitha veprimet ligjore si kryetar për të adresuar përgjegjësinë disiplinore lidhur me këtë rast”, thuhet në njoftimin e gjykatës.

Kryetari i Gjykatës Supreme zotohet se çdo rast i dyshimtë, pa përjashtim, nga bartësit e funksioneve gjyqësore, do te trajtohet ne mënyre efikase dhe te drejtë.

Ndryshe, lidhur me këtë rast, të martën ka reaguar edhe kryeprokurori i shtetit, Aleksander Lumezi dhe ministrja e drejtësisë Albulena Haxhiu./arbresh.info/